KABALE YUNIVASITE KUTANDIIKA KUCONDOOZA AHA MAHAMBA AGARI OMWIHANGA
Kabale Yunivasite etungire hiika 2.1 kuruga omwihamba rya Echuya kucondoorezaho
NEBYA: Nelson Ahimbisibwe
Eitendekyero erya Kabale Yunivasite ritire omukono aha ndagaano y’okukwatanisa n’ekitongore ekirikurinda amahamba ekya (National Forestry Authority) kutandikaho omwanya gw’okucondooza omukibira kya Echuya ekirikushangwa omuri Kisoro hamwe na Rubanda.
Endagaano egi eriho kwongyera amani abeegi abarikushoma amashomo gatarigamwe nagamwe agakwasire aha mahamba, eby’oburambuzi, hamwe neby’obugainga bw’omwitaka noku gakubasibwa kurindwa.
Omukoro gw’okuta omukono aha ndagano gukorirwe omukyaro kya Rwaburindi omu muruka ogwa Ikamiro omugomborora eya Muko mu disiturikiti ya Rubanda. Ahu mukuru w’ekitongore ekyamahamba omwihanga Stuart Manirugaha, orikwebembera Yunivasite ya Kabale Prof Joy Kwesiga, abebembezi ba Disiturikiti ya Rubanda bebembirwe Prossy Akampurira bahikire aha mukoro.
Omu ndagaano, ekitongore ekya National Forestry Authority (NFA) baheriize eitendekyero rya Kabale Yunivasite hiika ibiri nekicweka (2.1 acres) zekiibira ahu barabe nibakorera emirimo yaabo yokucondooza.
Oijuke ngu eihamba erya Echuya nirimwe omu mahamba agarikushangwa omu disiturikiti ya
Kisoro hamwe na Rubanda . Eihamba rya Echuya rikatongozibwa omu omwaka gwa 1951 nkekibiira kya Gavumenti ekiine obuhango burikurenga kiromita 41.4km. Eihamba eri obucweka 20% nibushangwa omwishaza erya Bufumbira omu disiturikiti ya Kisoro reru obucweka 80% buri omu disiturikiti ya Rubanda.
