OBURI BWENGUZI OMWISHENGYERO RYA UGANDA BWAREGYESEREZA!!!
Abanyishengyero abamwe batandikire kweshereka obutakwatwa poriisi
Abanyishengyero abarimu owa Bunyole East Hon. Yusuf Mutembuli, Paul Akamba owa Busiki hamwe na Cissy Dianizia Namujju omunyishengyero wa Disiturikiti ya Lwengo baretwa omu kooti eya Anti- corruption omuri Kampala kwehozaho aha mishango ekwasire aha bushomankuzi.
Kurugirira aha mishango ei baine kwehozaho ekwatiraine nobushomankuzi, nikigambwa ngu aba bashatu omukwezi kwa katano ebiiro 13/05/2024 aha hoteri ya Africana bakashaba sente omukyara Mariam Wangadya orikwebembera akakiiko aka Uganda Human rights Commission yaba baba nibenda kurabyaho embarira ei ekitongore kyashabire gavumenti.
Nikigambwa ngu aha mbarira yomwaka 2024/25 eyekitongore ekya Uganda Human rights Commission, abanyishengyero aba bakaba nibenda abarikwebembera ekitongore eki babahereze 20% aha sente ezibabaire batire omu mbarira nekigyendererwa kyokwenda ngu bagihinguze.
Nikigambwa abanyishengyero aba batwire nibakwatanisa nabamwe aha bakozi abarikukora omu minisiture yebyesente kwiba ebitongore hamwe nokurabyaho embarira zebitongore obwe baheza kubihaho sente. Abanyishengyero aba nibo bamwe abatwire nibashoka akakumu hamwe nokuteganisa akakiiko akarikutebekanisa embariri eihanga eyomwaka 2024/25 obwe barikubaragiira kwongyeza sente aha bageti zebitongore bitari bimwe nabimwe nekigyendererwa kyokushomankura.
Abanyishengyero aba bakakwatwa ebiiro 10/06/2024 ekitongore ekirikucoondoza emishango ekya Crimal investigations bwanyima yokutunga okumanyisibwa oku barikwetengwa aha poriisi kwehoozaho. Oijuke ngu aha biiro 06/06/2024 mukuru weihanga obu yabaire nagambira eihanga, akaraganisa oku arikuza kubonereza abo abanyishengyero abarikukoragana naba minisiture yebyesente kwiba sente zihanga obwe barikurabira omu kuhinguza embarira yeby’esente eyomwaka ogu.
Oijuke ngu abanyishengyero abamwe bebembirwe Sekikubo bariyo nibaronda emikono yokwihamu obwesigye ba komishona 4 abayehiire akasimo ka 1.7 Biriyooni.
