ABASHOMAIRE RUTOOMA SSS BATANDIKIRE EHURURU YOKUGARUZAHO EISHOMERO RYABO.
Eshomero rikatandiika 1980 kandi obwahati ryine abeegi 364
Rutooma sss nirimwe omu mashomero agatandikire aha musigye gwediini kandi eryabaire riri eishomero ryamani omubwire obwenyimaho kandi niryo eishomero ryonka eryabaire riri omukyaga eki. Ekirikutangaza nokushanga ngu Rutooma SSS eishomero ryatandikire omu mwaka 1980 eryahisya emyaka 44 omu buhereza obwahati ririyo nirigyendesa ekisinganyima ahabwembera obutaba nungi omubikwatiraine nebyobwegyese hamwe nebyombeko byishomero nkoku kishemeraire.
Waaza kucoondoza abantu abashomaire omwishomero eri namunonga abo abarikuruga omukyanga ekya Ankole buzima nohurira washemererwa ahabwokushanga ngu abeegi abarabire omwishomero eri nabantu bamani munonga omu Gavumenti eriho kwonka ekyokutungura eishomero eri barabiremu kukiri amino garuguru.
Nkomuringo gumwe gwokweteera omukifuba bamwe aha beegi abarabire ahishomero eri batandikire ehururu yokugaruka ahishomero ryabo bakaritungura obwe barikukora emirimo etaryemwe nemwe.
Eizoba rya nyimwabazyo ebiiro 09.10 .2024 aha kiiro kyokwetegyeka, abashomire ahishomero eri bagizireho omukoro gw’okushabira abeegi abekibiina kya 4 hamwe nekya 6 abariyo nibetebekanisa kutandiika ebigyezo byabo byahamuhero. Okushaba kubaire aha kanisa eyoburiisa obwa Rutooma ahu Rev. Steven Turyasingura ayebembire okushaba oku obwe arikwehanagiriza abazaire hamwe nabeegi okutaho omutiima omubibarikukora ahabwokuba niho obusinguzi buraije kuruga.
Bwanyima yokushabira abeegi aba, habaireho okugabira ebirabo abeegi abarikuza kukora ebigyezo.Kabwebwe Jonason omwe omubashomaire ahishomero eri naagira ngu ebirabo ebihirwe abeegi nebyo ebirabahwere omubwire bwebigyezo kandi ebi birugire omuri bamwe abashomaire ahari Rutooma SSS.
Obwahati eishomero rya Rutooma ryine omubaro gwabeegi 364 kandi abashomireyo baine amastsiko ngu abeegi nibaza kweyongyera. Mukuru weishomero eri naagira ngu nobu ariyo nakora ekirikubasiika kureba ngu bagiira omutindo murungi gwebyobwegyese, kwonka baine ebizibu byingi munonga ebirikuretera batakoragye emirimo nka obutagira zakanyabwegye,rabaratore hamwe nentebe zabeegi kushutamira.
Nikwe kushaba mukuru weihanga kuhikiriza ekiyaraganise omu 2016 obwaba eri omuri Rutooma ahu yaraganise okwarukuza kuhunduza eishomero eri ahabwokuba rikabahwera munonga obu babaire nibakwata gavumenti egi.
