BIRIYOONI 30 Z’OKWOMBEKA EKYOMA KYEHUUZI OMURI SHEEMA ZIKAKORA BUSHA- ABANYISHENGYERO
Bruno Mugizi – Sheema.
Abanyishengyero abarikushutama aha kakiiko kembarira eihanga ninga shi akutwakweta Parliamentary Budget Committee nikenda abeby’obushoboroozi batandikye kucoondoza emirimo erikukorerwa aha mwanya ogu bayombekiremu ekyoma kyehuuzi ekirikushangwa omukyaro kya Rubaare Nyarwenshama wodi Sheema munisiparite.
Abanyishengyero aba babaire bari aha murimo gwabo gw’okurambura purojekiti za Gavumenti nokureba oku sente z’omuhi w’omushoro zirikukoresibwa. Omu 2017 Sheema Disiturikiti erikukwatanisa nekitongore ekya Uganda National Council of science and technology (UNCST) bakahinguza kwombeka fakitore eyehuuzi omuri Sheema hamwe nokuhinga emisiri yekyereere ezabaire ziri ezokuriisa obukoko oburikushohoza ehuuzi.
Disiturikiti ya Sheema ekaherezayo eitaka kutandiika kwombeka fakitore egi hamwe nokuhinga emisiri yekyereere ezibaire ziri ezokuriisa obukoko oburikushohoza ehuuzi. Omundagano y’emyaka ikumi ei disiturikiti yabaire ekozire nekitongore eki, emyaka mushanju ehwireho tihariho ekyakozirwe kandi nemisiri eibabaire bahinga ekagwa omu bikande.
Abanyishengyero abarikuruga omu Bushenyi empago abarimu Dickson Kateshumbwa, Juliet Bashisha hamwe na Nyakikongoro, bagweirwe akagwe banyima yokureba ngu purojekiti eyabaire neza kuyamba abanya Sheema kuruga omubworo eriyo nekora busha kandi obwe sente nyamwingi zagwiremu.
Rosemary Nyakigongoro nayenda Gavumenti erugyeyo ekyondooze abebembezi ba Disiturikiti ya Sheema abarebire purojeki egi erikutandiika bakahunama ekahwerekyerera kandi obwe gwabaire guri omurimo gwabo kureeba ngu purojekiti egi yatunguka nkokukyabaire kiri omu purani.
Abanyishengyero aba bagwerirwe akagwe bwanyima y’okushanga ngu sente ezaguzire omwanya ogu purojeki egi erimu ezirikurenga Biriyooni 9, ebihandiiko ebirikworeka ngu bakagura eitaka biri omu maziina gabantu buntu .
Patrick Opolot obaire ayebembire abanyishengyero aba hamwe nabanyishengyero abandi bashabire abarikukurira purojeki eya Rubaare Sericulture project kwija omu paramenti kushoborora oku sente za Gavumenti zakoresibwe noku purojekiti eriyo nehwera abatura.
