EBYA SIPIIKA ANITAH AMONG NIBIZA KUKOMA NKAHI?? JACOB OBOTH OBOTH NIWE SIPIIKA WEISHENGYERO RYA 12.
Okukwatwa kwa Anitah Among kabaasa kuba kabaire kari akazaano ka NRM kumuremesa obwa Sipiika
Nebya : Lilian Abasa
Paramenti y’omurundi ogwa 12 eyashutama aha kishayi Kololo , yatoraana Jacob Markson Oboth Oboth nka Sipiika weishengyero omusya obwe arikuza omubigyere bya Anet Anitah Among. Oboth Oboth yatunga obururu 400 arikusinga abandi ababa bamwesimbireho nka; Paulo Mwiru owekigombe ekya NUP awatunga obururu 60, Nobert Mao owa DP yatunga obururu 15.
Oboth Oboth okwija kwesimba nibwanyima ya Mukuru wamahe ga Uganda Gen. Muhoozi Kainerugaba kurugayo akoreka oku bahingwize Oboth Oboth hamwe na Tayebwa kuba nibo bayebembera eishengyero. Akakiiko akakuru aka NRM akarikumanywa nka CEC bwanyima y’okushutama naabo bahingwize Oboth Oboth hamwe na Tayebwa kuba nibo bayebembera eishengyero.
Eki kikaijaho bwanyima y’okukwatwa kwa Anitah Among ahu abeby’okwerinda bahikire omu makage kandi ebintu nyamwingi ebirimu emotoka zamani hamwe nebihandiiko bitaribimwe nabimwe kuruga omu maka ge bikatwarwa aha poriisi obwe okucoondoza kurikugumizamu.
Ebi kubyabireho, Anitah Among owabaire atwire erikugamba oku akakikiiko ka NRM aka CEC kahingwize we na Tayebwa kuba nibo bayebembera eishengyero, arugireyo yayoreka oku ataraije kwesimba omu karuru kwobwa sipiika kurabira aha mukuru gwe ogwa X.
Eky’okutangaza nokushanga ngu Anitah Among owarondire puresidenti Museveni akaruru okwetorora Uganda yoona, tiyabasa kuhiika Kololo kuteera akaruru kokuronda ninga kugiira ou yatorana ahabwa sipiika. Oije ngu sipiika Anita Among abanya Uganda bakahereruka kumureba obu mukuru weihanga arahiira, ebyakurasireho kukaba okuri okumukwata nokuhisya nahati tihaine oramurebiire.
Abanyishengyero abakyara nobu bagyezaho kurugayo bakoreka oku baine kuronda omukazi aha kya omuhwezi wa sipiika, eki tikyaremesa abanyishengyero kugumizamu bakaronda Hon. Tayebwa nka omuhwezi wa Sipiika bwanyima y’okwihayo obururu 457 kandi abandi abarimu Sarah Aguti yatunga obururu 14 reru Asinansi Nyakato yatunga obururu 45. Eki nikimanyisa ngu Paramenti y’omurundi gwa 12 neija kuba aine sipiika w’omushaija kandi ahwerweho omushaija.
Abarikuteera tooki omunshonga zeby’obutegyeki niboreka oku mukuru weihanga Kaguta Museveni abaire atakwenda Anita Among kugaruka kuba sipiika ahabwamani agu abaire yagiira hamwe nobushoboroozi obumurengire. Eki nikimanyisa ngu obu baronda sipiika omusya ebya Anitah Among bibasa kukoma ahu bibaire byahiika ahabw’okuba akazano keby’obutegyeki bakazana kahwa.
