KANSARA WABAREMA NATEKATEKWAHO KUBA NIWE AHONGIRE OMWANA OWARI ISHENTO OMURI KITAGWENDA
Nikigabwa ngu na munyanya owahisya emeezi 10 abuzire niwe yamuburizeho
Abatuura abomukyaro kya Nyaruhanda omu wodi eya Kikundo Kabujogyera tauni kanso Kitagwenda Disiturikiti bagwerirwe akagwe obu Kansara wabantu abaine obureema aha mubiri Levi Amarakutunga ou baingi barikumanya nka DJ LEVI NYAMAGOYE omweshongozi webyeshongoro byendiini kuhonga omwana wa mukuru we.
Trina Ainomugisha emyaka 4 y’obukuru niwe bashangire omu faamu ya kansara Levi omu kisharara anagirweyo kandi ashaziire namaraka. Poriisi kuruga aha kitebe ekya Kitagwenda kwehikire omu maka ga Levi obwe barikucoondoza nikwe kushanga harimu eshagama esigiire aha bisiika hamwe nemyenda yomwana ei abaire ajwire eri omu bafu erimu eshagama.
Abatuura bwanyima yokumanya ngu Kansara Levi niwe akozire ekikorwa eki batandikireho bateema orutookye rwe hamwe nokwita ente 15 ezindi bazifutaza. Ogu akwasirwe Poriisi yamutwara kwogyera kumucoondozaho.
Kurugirira ahari ishe womwana Vicenti Back naagira ngu omwana we bamushangire ashazire amaraka kwonka tigacwekireho. Nikwe kushaba poriisi kukora ekihikiire hatarimu obushomankuzi bwoona aha kikorwa ekibireho.
Omubiri gw’omwana Trina bwanyima yokutwarwa poriisi ekagukyebeera bamazire bamuziika kurugirira ahari Ishe Vicent kandi orikuzarwa na Levi.
Oijuke ngu Munyanya wa Kansara Levi nawe yahisya ameezi 10 abuzire batarikumanya ahu yaburire ahu abatuura barikugiira ngu niwe omwe owaburizeho munyanya omugyeri etarikwetegyerezibwa.
