TWARUHA NA PARAMENTI EIJWIRE OBUSHOMANKUZI!!!!
Nayeenda mukuru weihanga ashazemu emirimo yoona erikukorerwa omu paramenti ya 11
TWARUHA NA PARAMENTI EIJWIRE OBUSHOMANKUZI!!!!
AINEMBABAZI BRIAN KAKOOKO
Obwahati ebigambo ebiri omu banya Uganda nebigambo ebikwatiraine n’obushomankuzi obwijwire omu bitongore bya Gavumenti hamwe noku abanyishengyero abu abantu baterire akaruru bari omwishengyero nibahuta sente zomuhi w’omushoro.
Eki nikijaho bwanyima yamakuru kurugayo garikworeka oku abanyishengyero barikukoragana nabebembezi abari aha bukiiko oburikutebekanizisa embariria eihanga kwiba sente. Esabiti ehwaire abanyishengyero abarimu owa Bunyole East Hon. Yusuf Mutembuli, Paul Akamba owa Busiki hamwe na Cissy Dianizia Namujju omunyishengyero wa Disiturikiti ya Lwengo bakaretwa omu kooti eya Anti- corruption omuri Kampala kwehozaho aha mishango ekwasire aha bushomankuzi.
Obwahati ebitongore hamwe nabantu barugireyo barikworeka oku eihanga ririyo nirihwerekyerera ahabwobushomankuzi oburi omwihanga. Ainembabazi Brian Kakooko obwahati arugireyo yahandiikira mukuru weihanga arikumushaba kwakoresa obushoborozi obwamuhirwe abase kwihaho eishengyero eri eryomurundi gwa 11 ahabwokuremwa kukora omurimo gwabo.
Omu baruuha ei ahandikiire mukuru weihanga nayoreka oku eishengyero rya 11 rikozire omurimo muhango kyahiika aha kushomankura sente zomuhi womushoro ekirikuretera ekitinisa kya paramenti kyasisikara. Obushomankuzi omwishengyero ryihanga kurugirira ahari Brian bukatandikira omubwire bwa Covid19 ahu ebintu ahamwe na sente ezahirwe abantu hamwe nebitongore zitarakozire murimo gwazo.
Enshonga yamabati ga Karamojja nayo ekareka ba minisita barikwehozaho omu kooti ahu abamwe emirimo yaabo yobwa minisita ekabihwaho kandi batunga na namabaruha agari kubazibira okuza omu mahanga gabajungu. Sente zakasiimo kamajuta agu bariyo nibatimba omwihanga, okushashura emishara emizimu yabantu abarikukora omwishengyero nibimwe ebiretiire paramenti ya Uganda yayoreka eiziina ribi.
Ainembabazi Brian Kakooko naagira ngu obwahati paramenti ya Uganda tekiine mani nkoku kishemeraire kuba kiri ahabwokuba abanyishengyero abakubaire nibateseza eihanga bahugiire omukwiba sente zomuhi w’omushoro.
Eki kiretiire abantu babihamu obwesigwa, kandi na purojekiti za gavumenti ezakubaire niziyamba abanya Uganda nazo zaburwa kuhwa ahabwobushomankuzi ekirikuretera obuhereza omwihanga bwabura.
Obwahati Ainembabazi Brian Kakooko nayenda mukuru weihanga akorese obushoboroozi ayemereze emirimo yoona eishegyero ryihanga ahabwokuba ebibarikukora bashwarize ekitinisa kya paramenti ya Uganda. Mukuru weihanga yakora eki nikiza kuba ekyokureberaho ahabandi bebembezi.
Embaruha y’okushaba mukuru weihanga yahandikwa
Ainembabazi Brian Kakooko. ([email protected], +256772516892) kuruga omuri Ruhinda Mitooma Disiturikiti kandi ori omurwanirizi wendembe ryabantu.
