OBUCWEKA 60 AHARI 100 BWABA CEYAMANI ABATWIREHO NIBAIJA KUSINGA AKARURU
Ebyaro 71,214 nibyo biraronde ba ceyamani omu Uganda akaruru nikaza kuterwa 28/07/2026 kandi n'akomugongo
Nebya :Akatukunda Ruth
Ekitongore ekirikwebembera okuteeza akaruru omwihanga kashohwize engyenderwaho eibaraije kukuratiira obwe barikuteera akaruru ka Ceyamani LC1 hamwe nokuronda obukiiko obwabakyara. Orikwebembera akakiiko keby’obururu omwihanga omuramuzi Simon Byabakama arangirire oku omurimo gw’okuteza akaruru ka LC1 gurikwija kutandiikana nokushwijuma amaziina gabateezi bakaruru okutandiikana ebiiro 06/07- kuhisya 10/07/2026.
Amaziina g’abateezi bakaruru nibaija kugahaniika n’ekigyendeerwa kyabury’omwe kwereba yaaba ari omu rwegyesita. Eki nikiza kutandiika ebiiro 13/07 kuhisya 14/07/2026.
Byabakama naagira ngu akaruru aka nikaza kuhereza buri munya Uganda weena omugisha gwokuronda omwebembezi oramwebembere.
Akaruru akokuronda abebembezi babakyara, abatezi bakaruru nibaija kuronda abakyara 5 abaraze aha kakiiko ako abarimu ceyamani, omuhwezi we ,omuhandiiki, omubiiki hamwe nowebyamakuru.
Boona abakyara abarikwenda kwesimba aha ntebe ezi baine kuba baine emyaka 18 y’obukuru kandi behandikise omu rwegyesita yabatezi bakaruru. Baine kuba bari abatuura bekyario ekyo kandi tihaine kihandiiko kyona kyebyobwegyese ekirikwetengwa waba noza kwesimba aha bukiiko obwe.
Abakyara abarikwenda kwesimba aha ntebe ezo tihariho okushashura sente zoona. Abo boona abarakwatwe barikwihaho abarikwenda kwesimba sente nibaija kutebwaho omushango.
Akakiiko ka LC1 nikaija kuba kariho abantu 11 kandi okwihayo empapura zokwesimba kwaba ceyamani bebyaro nikwija kubaho ebiiro 09/07 kuhisya 14/07/2026. Ebigombe byobutegyeki byoona nibikirizibwa kuronda abarabakwatire ebendera omu karuru kokuronda ba Ceyamani bebyaro kandi tihariho sente zoona ezirikwentegwa kurugirira ahari Byabakama.
Abarikwenda kwesimba bwanyima y’okwehandiikisa nibaija kutandiika kusherura obushagiki omu bantu kutandiika ebiiro 20/07 kuhisya 27/07/2026. Okuteera akaruru kokuronda ba ceyamani nikuza kubaho ebiiro 28/07/2026.
Okuteera akaruru kokuronda LC2 nikaija kubaho bwanyima y’okuheza kuteera aka LC1. Abo abarikwenda kwesimba nibaija kwihayo empapura kutandiika ebiiro 29/07/2026. Okutorana abo abarabe nibenda kwesimba aha LC2 nibaija kubatorana ahagati yebiiro 3/08/2026. Kampiini niziza kutandiika ebiiro 4-9/08/2026. Obururu obu bwoona nibwija kuba obwomugongo ahu abantu baraije kuteera orunyiriri.
